«Իմ ամենասիրելի օրը դեկտեմբերի 25-ն է: Այդ օրը մեր ընտանիքում կրկնակի տոն է` իմ որդու և կնոջ ծննդյան օրն է, և այդ օրվանից ինձ համար սկսվում են ամանորյա տոները: Ինչպես և միշտ, այս տարի Նոր տարին դիմավորելու եմ ընտանիքիս հետ ԱՄՆ-ում»,- PanARMENIAN.Net-ի թղթակցի հետ զրույցում խոստովանել է Հայաստանի հավաքականի հարձակվող Յուրա Մովսիսյանը:
Ֆուտբոլիստի խոսքով` Ամանորին միշտ ավելի լավի հույս ունես, և ամեն ինչ անցյալ տարում է մնում. «Իհարկե, ես հավատում եմ Ձմեռ Պապին, բայց դեռ չեմ հանդիպել նրան: Մանկության տարիներին ես միշտ նվերներ էի սպասում նրանից, իսկ հիմա ես ինքս եմ սիրում նվերներ տալ: Տարվա ընթացքում իմ բոլոր մտերիմներին տարբեր նվերներ եմ տալիս»:
Մովսիսյանը հույս ունի, որ 2012 թվականն ավելի հաջող կլինի, և Հայաստանի հավաքականը ավելի շատ հաղթանակներ կտոնի:
«Շնորհավորում եմ բոլորին գալիք տոների կապակցությամբ և մաղթում եմ առողջություն, հաջողություն, նորանոր ձեռքբերումներ և' մեր հավաքականին, և' բոլոր հայերին»,- հավելել է ֆուտբոլիստը:
