Սիրիայի ու Թուրքիայի հարաբերությունները շատ լավ մակարդակում էին, սակայն, դրանք չեն կարող վերականգնվել նույն մակարդակով, այն բանից հետո, երբ Թուրքիան սատարեց սիրիացի ապստամբներին: Նման կարծիք հայտնեց ՀՀ-ում Սիրիայի գործերի ժամանակավոր հավատարմատար Մամուն Հարիրին:
Ըստ դիվանագետի, բողոքի ակցիաները սկսեցին Ալ-Քաեդայի ահաբեկիչները, որոնք թափանցեցին Սիրիայի տարածք Լիբանանի սահմանով. «Լիբանանը զգուշացրեց մեզ գրոհայինների խմբերի տեղաշարժի մասին: Ուստի մեզ շատ զարմացրեց բարեկամ Թուրքիայի ու Քաթարի արձագանքը, որոնք սատարեցին այդ ուժերին»:
Անդրադառնալով Թուրքիայի դիրքորոշմանը՝ Հարիրին հայտարարել է, որ Թուրքիան պետք է ավելի մեծ ուշադրություն դարձնի սեփական երկրի ներսում քրդերի դեմ ընթացող պատերազմին: «Սիրիային խորհուրդներ տալուց առաջ, Թուրքիան պետք է լուծի իր խնդիրները»:
Հարիրին նաև նշել է, որ նման դիրքորոշում զբաղեցնելով, Թուրքիան հակասում է իր իսկ «զրո խնդիրներ հարևանների հետ» քաղաքական կուրսին:
Սիրիայում անկարգությունների մեկնարկից ի վեր թուրքական իշխանությունները բազմիցս են կոչ արել Սիրիային դադարեցնել բռնությունը երկրում: Ավելին, հենց Ստամբուլում են ապստամբները հիմնել Անցումային խորհուրդը, որը համակարգում է բողոքի գործողությունները Սիրիայում:
