Տոնական օրերին հանգիստը չորս մարդու համար Հայաստանի հանգստավայրերում միջինը կազմել է 2000-3000 դոլար: Այդ մասին Երևանում կայացած մամլո ասուլիսում հայտարարել է Հայաստանի հյուրանոցների ասոցիացիայի նախագահ Հակոբ Հակոբյանը: Դա, ըստ նրա, վերաբերում է մասնավորապես Դիլիջանի, Ծաղկաձորի, Աղվերանի, Սևանի հյուրանոցներին: Հակոբ Հակոբյանը նշել է, որ դեկտեմբերին ամանորյա հանգստի կազմակերպման տեսակետից զգալիորեն ավելացել են ներգնա զբոսաշրջության ծավալները: Այդ համատեքստում Հակոբյանը նշել է, որ դա վկայում է այն մասին, որ հայերը գերադասում են Նոր տարին դիմավորել տնից դուրս:
Իր հերթին Հայաստանի տուրօպերատորների ասոցիացիայի նախագահ Մարինե Կպրյանն ասել է, որ անկախ բարձր գներից, տեղեր հյուրանոցներում շատ դժվար էր գտնել:
Անդրադառնալով այն հարցին, թե արդյոք շատ էին Ամանորն արտերկրում դիմավորել ցանկացողները, մամլո ասուլիսի մասնակիցներն ասել են, որ ցանկացողների քանակը քիչ է եղել: Ըստ Կպրյանի, պատճառը ոչ թե վատ պայմաններն են, այլ գովազդի ու ամանորյա ծրագրի բացակայությունը:
