Արցախի Հանրապետության նախագահ Բակո Սահակյանը հունվարի 20-ին մասնակցել է Դատական համակարգի աշխատողի օրվան նվիրված տոնական միջոցառմանը և շնորհավորել ոլորտի ներկայացուցիչներին մասնագիտական տոնի առթիվ:
Իր խոսքում երկրի ղեկավարն ընդգծել է, որ Արցախի բնականոն զարգացման ու քաղաքացիական հասարակության ձևավորման գործում չափազանց կարևոր է դատական համակարգի դերը և նրա յուրաքանչյուր աշխատակցի կատարած աշխատանքը: Բակո Սահակյանը կառույցի հանդեպ վստահությունը համարել է պետությունում օրենքի գերակայության, քաղաքացու իրավունքների և արդարության պաշտպանության ամենաիրական չափանիշներից մեկը:
Նախագահը նշել, որ վերջին մի քանի տարիների ընթացքում հանրապետության դատական համակարգում իրականացվել են լուրջ բարեփոխումներ, որոնք շոշափելի ազդեցություն են ունեցել նրա գործունեության արդյունավետության բարձրացման վրա: Միևնույն ժամանակ, նախագահ Սահակյանն ընդգծել է, որ համակարգում անելիքները դեռևս շատ են: Այս պարագայում առանցքային նշանակություն ունեն դատավորների բարձր բարոյական և մասնագիտական հատկանիշները, կադրային ճիշտ քաղաքականությունը, դատավորների վերապատրաստումն ու փորձի փոխանակումը:
Բակո Սահակյանը վստահեցրել է, որ ԼՂՀ իշխանությունները կշարունակեն մշտական ուշադրության կենտրոնում պահել համակարգի գործունեությանն ըստ ամենայնի աջակցելու, դատավորների աշխատանքային և սոցիալ-կենցաղային պայմանների բարելավման հարցերը:
