ՀՀ Զինված ուժերի N զորամասի ժամկետային զինծառայող, սերժանտ Ռուբիկ Միքայելյանն այսօր Հայաստանի Զինված ուժերի կազմավորման 20-րդ տարեդարձի կապակցությամբ սահմանել է արտակորման նոր ռեկորդ` հաղթահարելով անցյալ տարվա սեպտեմբերի 21-ին կատարած նույն վարժության սեփական ռեկորդը: Նա 4 ժամ 35 րոպեում կատարել է 7550 արտակորում (անցյալ տարի կատարել էր 6500 արտակորում):

Ռեկորդը գրանցել է Գինեսի ռեկորդների հայաստանյան գրասենյակի ներկայացուցիչ Վարդան Թովմասյանի գլխավորած հանձնաժողովը: Վերջինս լրագրողների հետ զրույցում ասել է, որ սերժանտ Միքայելյանի սահմանած ռեկորդը կգրանցվի նախ Հայաստանի ռեկորդների գրքում՝ «Դյուցազնագրքում», ապա սահմանված ռեկորդի տեսանյութը կուղարկվի Լոնդոն` Գինեսի ռեկորդների համակարգող հանձնաժողովին` հայ մարզիկ-զինվորի ռեկորդը գրանցելու համար: Թովմասյանը նաև նշել է, որ նման ռեկորդ աշխարհում դեռ ոչ ոք չի սահմանել: Մասնագիտությամբ սամբիստ Ռուբիկ Միքայելյանը, ով արդեն 8 ամիս ծառայում է ՀՀ Զինված ուժերում, մտադիր է մինչ ծառայության ավարտը արտակորում վարժության ռեկորդը հասցնել 10 000-ի: