Թուրքիայի վարչապետ Ռեջեփ Թայիփ էրդողանը քննադատության է ենթարկել ամերիկացի գրող Փոլ Օսթերին, որը հայտարարել է Թուրքիան բոյկոտելու մտադրության մասին, հաղորդում է Associated Press-ը: Վարչապետի դժգոհությունը հարուցել են գրողի խոսքերն այն մասին, որ նա գնում է այդ քայլին ի նշան ներկա իրավիճակի դեմ բողոքի, երբ թուքական բանտերում նստած են շատ գրողներ և լրագրողներ:
«Ո՞ւմ է ընդհանրապես հուզում՝ կժամանի նա, թե ոչ: Թուրքիան ոչինչ չի կորցնի այդ պարոնի բացակայությունից»,- ասել է Թուրքիայի վարչապետը:
Այդպիսով նա արձագանքել է թուրքական մամուլում Օսթերի հարցազրուցին, որում նա հայտարարել է, որ ոչ մի դեպքում չի մեկնի Թուրքիա կամ Չինաստան, քանի դեռ այնտեղ բանտերում նստած են այդքան շատ գրողներ և լրագրողներ:
Թուրքական բանտերում տարբեր մեղադրանքներով գտնվում են տասնյակ լրագրողներ, ինչն առաջացնում է Արևմուտքի վրդովմունքը: Սակայն Անկարան դրան մեծ ուշադրություն չի դարձնում, հայտարարելով, որ նրանք բոլորը պատժվում են իրենց աշխատանքի հետ չկապված հանցագործությունների համար:
